ETXERAT (2024-I-24). Euskal presoen dispertsioa igaz bukatu zelarik, lanean jarraitu behar dugu, berandu baino lehen, preso, iheslari eta deportatu guztiak etxean izateko. Bitartean, Kinkea promozioak bidelagun izango ditugu. 2024ko Kinkea promozioak aurkeztu berri ditugu. Kepa "Akixo" dugu aurtengo artelanen egilea. Zazpi urte betetzen dira Kinkea izeneko egitasmoa abiatu genuenetik.
Zer esanik ez, zazpi urte hauetan berebiziko garrantzia izan du Kinkea egitasmoak gure senide presoen asistentzia juridikoa eta osasun asistentzia bermatzeko eta Etxerat elkartearen jarduera posible egiteko.
2017 urtearen bukaeran, konpromiso berriak hartu zituen elkarteak bere gain, gure senide presoen asistentzia juridikoa eta osasun asistentzia alegia. Erronka garrantzitsua izanik, plangintza ekonomiko eraginkorra jarri genuen martxan eta Kinkea izan zen plana garatzeko zutabe garrantzitsuena.
Baina ekimenak ez zukeen ezertarako balioko, milaka pertsonak Kinkearen konpromisoa hartu izan ez balute. Beste behin ere, herri honen elkartasuna funtsezkoa izan da presoen eta senideen aldeko lana zorroztu ahal izateko. Zazpi urte horietan, euskal preso, iheslari, deportatu politiko eta haien senideekiko elkartasunari bide eman diogu.
Balio hori aitortu eta transmititu nahi dugu Kepa "Akixo"k aurtengo Kinkea promozioetarako laga dituen artelanen aurkezpenean. Konponbiderako eta behin betiko bakerako, preso eta errefuxiaturik gabeko gizarterako bide honi aurre egitea ahalbidetzen digun elkartasuna. Eskerrak eman nahi dizkiogu Kepari bihotzez, elkartasuna lehen pertsonan uztartu duelako bere obra eskainiz.
Lau arte lan prestatu ditu Kepa "Akixo"k aurtengo Kinkea izeneko promozioen bitartez Etxerat Elkartearen behar ekonomikoei aurre egiteko. Lehenbiziko promozioan, udaberriko promozioa alegia, "Munduari begira" izeneko irudia banatuko dugu. Udako promoziorako "Itsasoarekin bizi" titulua duen artelana banatuko da. Ondoren, udazkeneko promozioari dagokion ilustrazioa "Astrakzioa" titulupekoa izango da eta, laugarren promoziorako, "Kaosaren antolaketa" lana banatuko dugu.
Beti bezala, 25€ren truke ilustrazioa jasoko duen bakoitzak, zozketa baten parte hartzeko boleto bat jasoko du. Zozketak notarioaren aurrean, aplikazio informatiko baten bitartez gauzatuko dira martxoaren 21ean, ekainaren 21ean, irailaren 21ean eta abenduaren 21ean. Banatutako boleto guztiak sartuko dira zozketa hoietan. Zozketa bakoitzean 20.000€ sari bat, 5.000€ ko 3 sari, 1.000€ 15sari, 500€ 20 sari eta 100€ko 100 sari zozketatuko dira. Informazio gehiago eta promozioaren oinarriak https://kinkea.eus/ en jaso ditzakezu.