AZKEN ALBISTEAK.

Lexuri Gallastegi eta Gorka Martinez euskal preso politikoak hurbilduak izan dira

ETXERAT (2022-I-24). Lexuri Gallastegi Sodupe preso berangotarra hurbildua izan da Zuerako espetxetik (245 km) Martuteneko espetxera. Bestalde, Gorka Martinez Ahedo preso urduliztarra hurbildua izan da El Duesoko espetxetik (170 km) Basauriko espetxera.

Francisco Jose Ramada presoaren berehalako askatasuna eskatzen dugu, bihotzeko krisi baten ondorioz ospitaleratu bait dute gaur goizean

ETXERAT (2022-I-21). Francisco Jose Ramada Estevez Irungo preso politikoa gaur goizean ospitaleratu dute Donostia Ospitaleko Zainketa Intentsiboetako Unitatean, bihotzeko krisi baten ondorioz, ziurrenik arritmia baten ondorioz. Euskal presoa berehala lekualdatu dute, Martuteneko espetxean konortea galdu baitu.

Etxeratek animo mezu bat bidali nahi dio presoari une zail honetan, lehenbailehen sendatzea opa diogulako eta bere familiari elkartasuna adierazi eta besarkada bat bidali nahi diogu.

58 urteko Ramada Estevezek 21 urte daramatza espetxean. Murtzia I.ean zegoela, Euskal Herritik 830 km-ra, ebakuntza kirurgiko bat egin zioten. Ebakuntza horren ostean, espetxera itzuli behar izan zuen berehala, nahiz eta oraindik min handia izan. Etxerat Elkartetik modu publikoan salatu genuen erabaki hori. 2020ko ekainean bestalde, Iruñeko espetxera lekualdatu zuten, eta, azkenean, iaz Martutenera iritsi zen.

Ramada Estevez berehala aske uztea eskatzen dugu, bere egoera delikatua delako, eta kontuan hartuta, gainera, 2020ko irailean bere zigorraren hiru laurdenak beteta zituela, eta dagoeneko zigorraren azken fasean dagoela. Kondenaren azken fasean egonda, horrek berehala baimenak eta hirugarren gradua eskuratzeko aukera eman beharko lioke. Era berean, gaixotasun larriak eta sendaezinak dituzten 19 euskal preso politikoak aske uzteko eskaera berretsi nahi dugu.

Olga Comes Arambillet aske kondena osoa bete ondoren

ETXERAT (2022-I-19). Olga Comes Arambillet preso politiko iruindarra aske geratu da kondena osoa bete ondoren. Pasa den 2021ko azarotik baldintzapeko askatasunean zegoen eta 13 urteko zigorra bete du. Bat gutxiago!

Arantza Eziolaza ilustratzailearen lanak aurkeztu ditugu, Kinkea 2022 promozioak osatuko dituztenak

ETXERAT (2022-I-15). Gaur Kinkea promozio berrietarako artelanen aurkezpena egin dugu Gasteizen. Bertan, Arantza Eziolaza irudigilea eta 2022ko promozioak egin ahal izateko arte lanen egilea eta Jon Ander Resa Etxerat, Elkarteko Arabako koordinatzailea izan dira. Aurkezpena Gasteizko Etxerat Elkartearen egoitzan (Sarerekin konpartitzen duguna alegia) burutu dugu.

Lau arte lan prestatu ditu Arantza Eziolazak aurtengo Kinkea izeneko promozioen bitartez Etxerat Elkartearen behar ekonomikoei aurre egiteko. Lehenbiziko promozioan, udaberrikoa alegia, "Ehule” irudia banatuko dugu. Udako promoziorako "Mezulari" izeneko artelana banatuko da. Ondoren, udazkenari dagokion ilustrazioa “Paketea/Memoria” titulupekoa izango da eta laugarren promoziorako, neguan, "Itzulera" lerroburupeko lana banatuko dugu.

Beti bezala, 25€ren truke ilustrazioa jasoko duen bakoitzak, zozketa baten parte hartzeko boleto bat jasoko du. Zozketak notarioaren aurrean, aplikazio informatiko baten bitartez gauzatuko dira martxoaren 21ean, ekainaren 21ean, irailaren 21ean eta abenduaren 21ean. Banatutako boleto guztiak sartuko dira zozketa hoietan. Zozketa bakoitzean 20.000€ sari bat, 5.000€ ko 3 sari, 1.000€ 15sari, 500€ 20 sari eta 100€ko 100 sari zozketatuko dira. Informazio gehiago eta promozioaren oinarriak http://kinkea.eus/ en jaso ditzakezu.

Harrotasuna Xanti, Tibur, Mertxe eta utzi gaituzten gainerako senideengatik

ETXERAT (2022-I-9). Urte berriarekin, hiru egunetan jarraian, Xanti Iparragirre Perurena (88 urte), Tibur Elezkano Barrenetxea (91 urte) eta Mertxe Romano Catalán (79 urte); euskal preso politikoen senide, aita eta ama zirenak hil direla jakin dugu. Etxerateko komunitatetik, euskal preso, iheslari eta deportatuen senide garen aldetik, gure harrotasuna adierazi nahi dugu haiek ezagutu ditugulako eta gure esker ona partekatutako maitasun guztiagatik.

Era berean, gure elkartasunik beroena adierazi nahi dugu, eta bihotzetik besarkada maitekorra bidaltzen diegu Marixol Iparragirre, Iñaki Krutxaga eta Iñigo Zapiraini; Zaballako, Leongo eta El Duesoko ziegetara.

Zoritxarrez, herri honetako preso, iheslari eta deportatu politikoen zerrenda amaigabea da oraindik. Dagoeneko lau hamarkada baino gehiago dira euskal errepresaliatu politikoen eta, beraz, haien senideen aurkako zigorrak ezartzen dituztela. Duela hiru hamarkada baino gehiagotik aplikatu den salbuespenak, urrunketak eta sakabanaketak eragin ditu, hainbat eta hainbat gurasok familia-loturari eusteko jasan duten xantaiaren ondorioz, joan-etorri luzeak egin behar izatea seme-alabekin minutu gutxi batzuk egon ahal izateko.

Xanti, Tibur eta Mertxe dira haien seme-alabei agur esaterik izan ez duten hainbat eta hainbat senideetako hiru; salbuespenari mendeku logikan eusteagatik, euskal presoei zigorrak luzatzeagatik eta beste preso batzuei onartzen zaien espetxe ibilbidea egitea eragozteko euskal presoekiko mantentzen den blokeoagatik.

Bultzatzen jarraitu behar dugu, atzo Euskal Herriko kaleetan egin dugun bezala, preso guztiak berehala Euskal Herrira ekar ditzaten eta aske ateratzen has daitezen, haietako askori dagokien bezala, hainbeste sufritu duten senideen ondoan egoteko eta herri honetan behin betiko konponbideari eta bizikidetzari laguntzeko. Eta, jakina, Xanti, Tibur eta Mertxeri, baita utzi gaituzten familiar guztiei ere, bakoitzari musu bana bidaltzen dizuegu, inoiz ahaztuko ez zaituztegula erakusteko.

Maite zaituztegu!

Etxerat